काठमाडौँ, २५ असार । पत्रकार सूर्यकुमार क्षेत्री प्रथम राष्ट्रिय अन्तरमिडिया कप फुटसल प्रतियोगिता–२०७३ आगामी साउन १० गतेदेखि हुने भएको छ ।


प्रतियोगिता स्व पत्रकार क्षेत्रीका छोराको पढाइका लागि सहयोगार्थ हुन लागेको आज यहाँ आयोजित पत्रकार सम्मेलनमा आयोजक गोलपोष्ट स्पोर्टस् एण्ड ट्रेनिङ सेन्टर भैँसेपाटीले जानकारी दिएको छ । तीनदिने प्रतियोगिताका खेल फुटसल मैदान भैँसेपाटीमा हुनेछन् ।

सेन्टरका प्रबन्ध निर्देशक केशव थापाले खेल क्षेत्रको विकाससँगै पत्रकार क्षेत्रीका छोराको उज्ज्वल भविष्यका लागि थोरै भए पनि सहयोग हुन्छ भनेर आफूहरुले प्रतियोगिता आयोजना गर्न लागेको बताउनुभयो ।

प्रतियोगितामा प्रथम हुने टोलीले रु २५ हजार, दोस्रो हुनेले १५ र तेस्रो हुनेले १० हजार नगद पुरस्कार पाउनेछन् । प्रतियोगितामा समावेश हुने टोलीले रु दुई हजार प्रवेश शुल्क तिर्नुपर्ने छ ।

प्रवेश फारम वितरण खुलिसकेको बताउँदै प्रबन्ध निर्देशक थापाले खेलकुद पत्रकार मञ्चको त्रिपुरेश्वरस्थित कार्यालय र गोलपोष्टको कार्यालय भैँसेपाटीमा पाइने जानकारी दिनुभयो । प्रतियोगिता आगामी साउन १० देखि १२ गतेसम्म चल्नेछ ।

नेपाल प्रेस युनियनका सचिव पत्रकार क्षेत्रीको दुई महिनाअघि ३३ वर्षको उमेरमै ब्रेन ट्युमरका कारण निधन भएको थियो ।